Sa tuwing ako ay nag-iisa,
`Di maiwasang puso ay mangamba.
Dulot ng aking kinasadlakang kalagayan.
Sa aking kinabukasang walang katiyakan.
***
Paano kung wala na sila?
Ang mga taong aking sandigan.
Paano kung ako ay maiwan?
Nag-iisa at puno ng kalituhan.
***
Dibdib ay puno ng takot.
Isipin lamang, `di na makaya.
Tuwina ay tanong sa sarili,
Bakit ako ay nabuhay pa?
***
Aking galaw na may limitasyon.
Walang laya sa aking pagkilos.
Buhay na nakasalalay sa iba.
`Pagkat `di ko kayang mag-isa.
***
Kanino kakapit? Huhugot ng lakas?
Upang ako ay maging matatag
Na harapin ang aking hinaharap,
Kung tanging ako na lamang.