Alas sais na naman ng umaga

Dali-daling maliligo at magbibihis dahil aarangkada na

Ang mga dyip na mabilis magkarga

Dito pag mabagal kang kumilos, maiiwan ka.

Bilis! Takbo!

Andiyan na ang dyip na huminto sa kanto

Hawak sa bakal, humanap ng pwesto

Hinga lang saglit saka sumigaw ng "Bayad ho!"

BIYAHE, anim na letrang nagbibigay ng imahe

Sa pasyalan, eskwelahan, trabaho o parke

Na sumasalamin sa iyong layunin sa bawat araw

Sa iyong paglakbay, saan ka ba laging naliligaw?

Sa mga kasiyahan ba na nakapagbubutas sa iyong bulsa?

O sa mga tungkuling napipilitan ka?

Makakarating ka din sa istasyon ngunit susubukin ka muna

Ng mga bako-bakong daan na patitibayin ka

Magpatuloy, huwag bumalik sa umpisa

Hanggang ang biyahe ay mananatiling alaala.