Napakamakapangyarihan ng isang halik. Nagagawa nitong magpagaan ng kalooban, makapagpahayag ng damdamin at makagising ng isang nahihimbing na prinsesa. Katulad sa mga fairy tales ay nagawa ng White Prince na gisingin ang Sleeping Princess sa pamamagitan ng isang halik - iyon nga lamang ay sa hindi inaasahang paraan.
Dumagundong ang paligid at ang unang hinanap ng kakagising lamang na prinsesa ay ang dahilan kung bakit. Agad nasagot ang kwestyon niya dahil sa kanyang harapan ay nasaksihan niya ang mapupulang labi ng White Prince na nakalapat sa labi ng Black Prince.
Lahat ay nagsasaya sa kakaibang twist ngunit may isang puso na piniling matulog muli at kalimutan ang lahat. Sa kanyang muling pagbangon sa realidad ay higit pa sa mga kwentong piksyon ang mararanasan niya. Sa pagmulat ng prinsesa sa natutulog niyang damdamin ay sinisigurado niyang hindi niya hahayaang mawala muli ang prinsipeng tunay na nakalaan para sa kanya.