"Eiji is so sweet. Nang makita niya ako, sinabi niya agad sa akin kung nasaan siya. Sabi niya baka gusto ko daw dito muna mag-stay sa riding club. Maswerte ang magiging girlfriend niya, di ba?" anang si Monica habang nagcha-channel surfing.
"Oo. Aalagaan talaga niya ang girlfriend niya," sang-ayon niya.
Katatapos lang nilang mag-dinner. Iniwan muna sila ni Eiji matapos ang dinner para magkasarilinan. Pero sa halip na magkwento ng maraming bagay tungkol sa sarili o magtanong tungkol sa kanya dahil ang sabi nito ay miss siya nito at nag-aalala sa kanya, wala na itong bukambibig kundi s Eiji.
Kakaiba ang kislap sa mata nito habang sinasabi ang pangalan ni Eiji. Sa palagay niya ay si Eiji ang dahilan kaya nasa riding club ito at hindi siya.
Nilingon siya ni Monica. "So tell me? Sino ang bagong girlfriend ni Eiji?"
"Ha?" Di niya inaasahan ang tanong nito at di rin niya alam kung paano sasagot. "Hindi ko alam. Wala akong hilig sa tsismis."
Wala pa silang pormal na relasyon ni Eiji. Alam ng buong riding club na nagde-date sila. Ang alam nga ng lahat ay nobyo na niya ito. Di lang lumalabas sa riding club ang balita dahil mahigpit ang policy na anuman ang balita sa loob ng riding club ay di maaring malaman ng tagalabas.
Ginagap nito ang kamay niya. "I am really glad that I found you here. Siguro destined talaga na mapunta ka Stallion Riding Club para maisama ako dito ni Eiji."
Pilit siyang ngumiti. "S-Siguro."
Ibinagsak nito ang sarili sa kama. "I belong here. This is my world. Kung pwede lang mag-stay pa ako nang mas matagal. Kung magiging girlfriend ako ni Eiji, lagi na ako dito. Sa palagay mo ba mai-in love siya sa akin?"
Nagkibit-balikat siya. "Bakit naman hindi?"
Ito ang iniiwasan niya noon pa kaya gusto niyang iwasan si Eiji. Gusto rin ito ni Monica. At ngayon ay nakakaramdam siya ng guilt. Si Monica ang pinakamalapit niyang kamag-anak. Ni hindi niya dito masabi ang tungkol sa kanila ni Eiji. Di rin nito dapat malaman kundi ay masasaktan ito. Ayaw niyang saktan si Monica.
"Hindi ba magho-horseback riding tayo nila Eiji bukas?"
"Oo. Hindi ka komportable sa pangangabayo, di ba? Kung gusto mo huwag na lang nating ituloy." Marunong namang mag-horseback riding si Monica. Subalit di nito maibigay ang affection sa kabayo tulad ng ibang passionate horse riders.
"Magugunaw ang mundo pero di ako papayag na di matuloy ang paglabas namin ni Eiji bukas. Can I ask a favor, Keira?"
Tumango siya. "Ano iyon?" Di naman ito palahingi ng pabor kaya kung maibibigay man niya ang hinihingi nito ay ibibigay niya.
"Huwag kang sumama sa horseback riding namin ni Eiji."
PASIKAT pa lang ang araw niya ay nasa main stable na si Keira. Tiniyak niyang naka-ready na ang mga kabayong gagamitin nila Eiji sa pamamasyal sa riding club. Iyon ang paraan niya para bumawi sa di pagsama dito. Di kasi niya sinabi kay Eiji na di siya makakasama sa horseback riding. Sasabihin pa lang niya.
"Good morning!" bati ni Eiji at panakaw siyang hinalikan sa pisngi.
Ngumiti siya. Pero di niya maaring ipakitang masaya siyang makita si Eiji. Nakamasid lang kasi si Monica sa kanila. "Hi! Naka-ready na ang mga kabayo. Even Serenity is ready. After all, this will be her first real ride."
Iniiwas niya ang tingin kay Eiji tuwing hinuhuli nito ang tingin niya. She missed him so much. She had to restrain that thought. Lalo lang kasi siyang masasaktan dahil di niya makakasama si Eiji. Kay Monica ang buong araw nito.
"Wow! What a nice mare!" Hinaplos ni Monica ang leeg ni Serenity. "Siya ba ang sasakyan ko ngayon?"
"No! Serenity is Keira's!" tutol agad ni Eiji. Biglang nagdilim ang anyo nito na parang ayaw pahawakan si Serenity sa iba.
"Hindi. Kay Monica talaga si Serenity," wika niya. "Serenity is a gentle horse. Mas bagay siya kay Monica." Nagbigay siya ng instruction na isakay na si Monica kay Serenity para di na makakontra pa si Eiji.
"Anong sasakyan mo?" tanong ni Eiji.
"Sorry. Hindi ako makakasama. Kailangan ako sa stable ngayon. Mahirap ang magiging training ko kay Surreal. Hanggang ngayon nakikipaghabulan pa kami sa kanya dahil ayaw niyang magpalagay ng saddle."
Naningkit ang mata ni Eiji. "Sino ba ang may-ari ng kabayong iyon at pinahihirapan ka?"
"Si Sir Yuan," sagot niya.
Huminga ito nang malalim. Di nito pwedeng awayin si Yuan dahil isa ito sa pinakamasungit na member ng riding club. Ang nobya nitong si Quincy ang nag-request na I-train niya si Surreal.
Kinabig ni Eiji ang ulo niya at pinagdikit ang noo nila. "You will pay big time for this, Keira Averin. Miss na miss kita habang nasa Thailand ako tapos di man lang kita makakasama? Lagot ka kapag nasolo kita. Ikukulong kita sa villa ko ng isang buwan at hindi kita palalabasin hangga't di ka pumapayag magpakasal sa akin."
Di niya mapigilang humalakhak. "Tinatakot mo ba ako?"
"Hindi. It is a promise. I miss you, Keira."
"I miss you, too." Itinulak niya ito palayo. It was a hard act. Ayaw na kasi niyang malayo pa dito. "Take care of Monica, will you?"
Tumango ito. "Don't forget about our dinner tonight."
Bahagyang lumungkot ang mga mata ni Eiji nang sumakay sa Arabian stallion nito si Hazan. She felt a tinge inside her heart. Nagi-guilty siya. Wala itong kaalam-alam na pansamantala niyang inilayo ang sarili dito para kay Monica.
Pero hanggang kailan niya iyon maaring gawin? Matatanggihan ba niya si Monica kung hihiling itong tuluyan niyang layuan si Eiji para makapasok ito sa buhay ng binata? Naiipit siya sa pagmamahal kay Monica at sa pagmamahal kay Eiji.
Kilala niya si Monica. Di ito papayag nang di nakukuha ang gusto.