"Anawapenda wote wawili?" Akauliza kwa wasi wasi.
"Ha ha ha mama bwana, mimi sijui chochote, unaonaje umuulize mwanao akupe ukweli wote" Derrick akajaribu kukwepa maswali ya mama yake
"Derrick hebu acha kunilaghai ooohh" akamfinya tena kwenye mkono
"Aaaargh mama jamani" akalalama Derrick
"Kama hujui chochote kwa nini ulimleta Aretha na wakati unajua Joselyn atakuja na kaka yako?" Akamuuliza Derrick aliyekuwa akipuliza mkono ambao mama yake aliufinya...
"Nakusikiliza" mama yake akampa sura ya ukakamavu mwanae
"Okay.....okay mama. Mimi nilikuja na Aretha sababu ya kumtia wivu Joselyn. Sina ugomvi na huyo mwanamke bali mimi na yeye ni mafuta na maji" alipomaliza Derrick akanyamaza
"Ulijua kaka yako atakuwa njia panda wakiwa wote wawili hapa,kwa nini haukumjali ndugu yako zaidi ya mipango yako Derrick?"
Derrick akainama " mama nisamehe ila namna hiyo ndio mimi niliona namjali kaka. Nataka ajue kufuata moyo wake kwa mara ya kwanza kwenye maisha yake"
Mama yake akakaa kimya kwa sekunde chache kisha akamuuliza Derrick, "nilimuona Li akitabasamu ulipotaka Aretha aongozane na kaka yako, na yeye anahusika?"
"Mama jamani sijui kabisa kama Li anahusika. Mimi nilijaribu kuwapa nafasi wazungumze tu. Naomba niende Mrs Simunge nitachelewa darasani" akainuka na kutaka kuondoka lakini mama yake akamvuta akae.
"Sikia Derrick yule binti ni mstaarabu kabisa... na si vyema mkamfanyia michezo yenu ya ujana. Halafu kaka yako ni mtu mzima msijaribu kumfanyia mambo. Kama anamtaka mwacheni apambane mwenyewe." Akashusha pumzi kisha akaendelea
"Yule binti anakuchukulia kama rafiki... now heshima hiyo na si kumfanya kama mtoto mdogo unayeweza kumsukuma huku na kule. . Ni mkubwa yule usiutumie upole wake kumkandamiza....umenisikia Derrick Elvis?" Akamuuliza akimtazama usoni
"Ndio mama nimesikia. Nisamehe, nitamuomba na kaka msamaha... imetosha mama naomba niende" akaweka mikono pamoja na kuinamisha kichwa...
"Eeeshhhh..... haya nenda... usisahau jumamosi ni mgeni wangu. Asipokuja najua ni wewe"
"Hehehee umeshampenda mama" akasema Derrick na kukimbia baada ya kuona mama yake akimrushia mto uliokuwa kwenye kochi
"Aaaargh huyu kijana anakufanania Elvis"
******************
Masaa mawili ya kikao yaliyoyoma taratibu, katika ukumbi wa mikutano kila mkuu wa idara alikuwa makini kufuata maelekezo kutoka kwa Edrian Mkurugenzi Mkuu wa SGC pamoja na timu ya wataalamu wa mawasiliano wa kampuni. Linus
"Nafikiri maelekezo haya yatatusaidia utendaji wetu uwe mwepesi kwa sasa. Na kwa wale mlioko site tafadhali fanyeni scanning ya taratibu za oparesheni zote. Wanasheria watamalizia na vinavyopungua. Allan na mimi tutakuwa huko asubuhi kesho. Sina la ziada, nadhani maswali yote yamejibiwa. Niwatakie mapumziko mema, tuonane kesho."
Baada ya kusema hivi Edrian ainuka na kuelekea ofisini kwake. Akafungua jokofu na kutoa maji yake ya limao akanywa na kuelekea kukaa kwenye kochi huku akiangalia saa. Akaona itakuwa vyema akianza safari ya kuelekea kwa akina Aretha mapema asijekwamishwa na foleni.. akaweka vitu vyake na kuanza kutoka.
"Hey Loy fanya arrangement mapema za tiketi, Nitaenda G-Town na S-Town. Allan ataenda K- Town.. Nijulishe ukifanikisha"
Akatoa maagizo na kuingia ofisini kwa Allan
"Hey bro nina sehemu nawahi, nakuomba umalizie hapa. Tuonane kesho... tutakuwa na ukaguzi wetu. Loy anashughulikia tiketi."
"Sawa Bro, jioni njema"
Akatoka Ed akichukua lifti mpaka chini kwenye maegesho binafsi. Akaingia kwenye gari na kuanza safari ya kuelekea Moon street. Alipoingia tu barabarani aliona gari ya rangi ya kijivu ikiwa imeegeshwa pembeni ya barabara. Akavuta kumbukumbu ya jana usiku akahisi inafanana na ile iliyompita kwa kasi na kusababisha ajali ndogo. Akatamani kurudi lakini muda ulikuwa haumtoshi na yeye hakutaka mama yake Aretha amsubirie sana.
Akapiga simu yake.....
"Captain, kama una mtu karibu aangalie njia ya kuingia Lavender, kuna gari naitilia shaka... inafanana na ile ya jana usiku."
Alipokata simu akaanza kuwaza ni kwa namna gani atajaribu kumshawishi mama wa Aretha kuwa yeye ni mtu mwema kwa binti yake.