HINDI pa rin gustong mag-sink-in sa utak ko ang mga nalaman ko. Bakit ganoon? Bakit kung sino pa 'yung mga taong may mabubuting loob, sila pa 'yong nakakaranas ng ganito? Bakit sila pa? Ang dami dami namang mga taong masasama tulad ng mga magnanakaw, rapist at kung sino sino pa pero tumatagal ang buhay nila. Bakit 'yong mga tao pang tulad ni Daryl? They deserve to live longer.
Kinalma ko ang sarili ko. Pilit kong itinatak sa isip ko na hindi ko dapat ipakita kay Daryl na apektado ako o malungkot ako dahil sa nalaman ko. Ayokong ako na naman ang iisipin niya. Gusto ko, siya naman. Sarili naman niya. Palagi nalang niyang iniisip ang kapakanan ko.
Binuksan ko ang pinto ng kwarto kung saan naroon si Daryl. Narito kanina ang family niya at hinayaan ko muna silang mag-usap sa loob. He's awake at sinadya kong hindi muna magpakita. Hindi naman kasi niya ako girlfriend para magkaroon ng karapatan na tumigil sa tabi niya.
