Noon ay madalas akong dumungaw sa labas ng aking bintana,
ako'y nagmamasid at aking pinagmamasdan ang lahat ng aking p'wedeng makita
at tuwing may daraan, sila'y kakaway, ngingiti at mangangamusta.
Ako naman ay dali-daling bababa, "sayo'y ano na nga ba ang balita?"
kami'y magkwekwentuhan at magkakabalitaan.
Hindi ba anong saya ang dala ng simpleng pagkikita.
Ngunit sa paglipas ng mga taon
sa pagusbong ng makabagong panahon
ating mga kakayahan ay patuloy rin ang pag-ahon.
Kaya ako'y nagtataka…
ako'y nangangamba…
Bakit kung kailan ang abot ng ating paningin ay lumawak
tsaka pa tayo lalong nagkawatak-watak
ang dating iisa ngayon ay nag-iisa
Hindi ba anong lungkot ang dala ng simpleng pag-iisa.
Ngayon ako'y nakakulong na lamang sa aking kwarto
nakatingin sa isang maliit na bintanang kwadrado
umiilaw at nagpapakita ng mga letra, mga larawan at mga gumagalaw ng litrato.
Sa makabagong mundo ay panonorin mo ang mundong
nagsisiraan, nagbabangayan, nag-gagamitan,
nag-uudyok ng kaguluhan, ng kalungkutan.
Hindi ba nila naisip na ang isang pindot dala sa iba'y kirot
at sa mga buhay ay pagkawasak ang dulot.
Itong kapangyarihan na malayo ang naaabot
bakit hindi gamitin upang marami ay maabot
maghayag ng mabuting pagbabago.
upang ibalik ang dating mga tawanan, ang dating kasiyahan
Dahil Connected si Juan, Connected as one.