Uski nazar apnay saamnay khari uski hareef par thi. Jo kisi bhi waqt Raawiya ko is zameen par dhair karnay ki tajweez soch rahi thi.
Raawiya ka poora dhiyaan apni hareef ke haatho'n main pakri talwaar par tha, wo intzaar kar rahi thi ke kab wo ek halki si junbish(movement) karay to Raawiya apni banayi gayi tajweez par amal karay.
Maidan main chalti hawa Raawiya ki Ankho'n ko jhapkaanay par majboor kar rahi thi, par wo us ek pal ke liye bhi saamnay khari is hareef ko moqa faraham nahi kar sakti.
Un dono ko ek doosray ka muhaasira kartay Aisa mehsoos ho raha tha jesay dono main se koi bhi waar nahi karna chaahta. Par Raawiya apnay dushman ko itna to jaanti thi ke wo sabar naam se bilkul na-waaqif hai.
Aur Raawiya ki soch ke ain mutaabik us ki hareef ne Aagay Raawiya ki taraf barh kar Talwaar Raawiya ki gardan ki taraf laana chaahi.
Aur Ain us waqt jub Talwaar Raawyke ke bilkul nazdeek thi , Raawiya daaien taraf muri aur bina kisi dair ke apni talwaar Uski shai rug ke ooper rakh di. Par apni talwaar uskay jism main daakhil honay nahi di.
Ye sirf ek pal ka khail tha, agar Raawiya sirf ek pal ki bhi dairi karti to uski hareef ke haath main pakri talwaar uskay galay par apni jeet ka Ailaan karti dikhaayi deti.
Par..Aisa nahi huwa. Aur Raawiya ke honto par ab muskurahat bikhar gayi thi.
" bohat khoob Raawiya !!.." Peechhay se Jahaan-gheeer chachu ki Awaaz aayi.
Raawiya ne apni talwaar neechy ki to uski hareef ijaazat lenay ke baad us se peechhay hat gayi , aur Raawiya Jahan-gheer ki taraf mur gayi.
" par aap ne ek galti kar di." Jahan-gheer ne apni bhateeji ki saari khushi par paani phairtay huway ek ustaad ki tarhaan bolay .
"Konsi ghalti..? main to jeet gayi Chachu...?!!"Raawiya ne talwaar mayaan main rakhtay huway herangi se poochha.
" Raawiya jung main kabhi kabhi humaray paas itna waqt nahi hota ke hum dushman ke aglay waar ka intzaar karain..ek ek pal main hum kisi apnay ki jaan bacha saktain hain..aur apnon komkho bhi saktay hain. Jis tarhaan muqaablay main thanday dimaag se apnay aglay qadam ko soch samajh kar uthaana chaahiye , wahien humain us sochay samjhay qadam par kam se kam waqt main amal paira bhi hona parta hai. "
Jahan-gheer ne Raawiya ka turban durust kartay huway sanjeedgi se samjhaya aur wo ek shaagird ki tarhaan unki har baat bohat goar se sun rahi thi.
"Humain jitna jaldi ho sakay Aagay barhna hota hai.., kuchh samajh aaya..?" Jahan-gheer ne uskay gaal se mitti hataatay huway narmi se poochha.
" ji chachu.."
Us jung ke baad Jahan-gheer ne Sultan se farmaaish ki thi ke wo Raawiya ko talwaar baazi ka hunar sikhana chahtay hain.
Pehlay to Sultan ne saaf inkaar kar diya tha jald hi Jahaan -gheer ne unhain apni dalaail se aakhir raazi kar liya. Aur majbooran Aalam-gheer ko mazbooran Raawiya ko ye hunar jo wo pehlay chhup chhup kar seekhaa karti thi , ab khulay aam seekhnay ki ijaazat deni hi pari.
Wo Raawiya ko is qaabil dekhna chahtay hain ke khuda na karay agar wo kisi museebat main ho to , wo apni hifazat khud kar sakay.
Wo do saal pehlay ki tarhaan Raawiya ko sirf qismat ke sahaaray nahi chhor saktay thay.
" aur haan main bataana bhool gaya , aap ki Ammi ne paigaam bhaija hai ke wo aap ko yaad kar rahi hain.." Jahan-gheer ne yaad aanay par bataya to Raawiya ke chehray par bud-mizaaji si phail gayi thi.
"Ammi zaroor phir se meray liye naye kapray banwaanay de rahi hongi...hum baad main chalay jaain ge Chachu.."
" Raawiya buri baat.." Jahan-gheer ne usay thora sakhti se tanbeh kiya.
"Chachu wo phir se humaray ooper kapray rakh kar dekhain gi ke ye humaray ooper kesay lagtay hain..wo pichhlay teen maah se aisa kar rahien hain..humara dil nahi karta in cheezo ke liye....aap jaantay hain humaaray paas pehlay se naa jaanay kitnay naye kapray paray hain , jinhain humain ab tak pehannay ka moqa bhi nahien mila , aur ab aur naye kapray...? Humain Ammi ki ye fuzool kharchi pasand nahien.. " Ye Kehtay huway Raawiya ka lehja shikasta ho gaya tha.
Ek saal pehlay usay bataya gaya tha ke wo Ali naami shezaday se mansoob hai, aur tub se Raawiya se jitna ho saka tha usnay koshish ki ke wo apnay Baba ko samjha sakain ke wo un se door nahi jaana chahti , par uska har harba nakaam saabit huwa tha.
Kayi raatain usnay ye sochnay main guzaar dien ke wo shehzada kesa hoga, dikhnay main kya wo khush shakal hoga , ya bud-shakal ayaash...jo apnay haram main , kayi so kaneezain rakhay huway hai....?.,!
Apni Aakhri soch ko wo humaisha khud hi is daleel se jhutla deti ke uskay Baba apni dukhtar ke liye kisi Ayaash sift insaan ka kesay intikhaab (choose) karain ge.
Par Ahmed ka kya..?.wo to bachpan se Ahmed ke saath apni zindagi ke khuaab dekhti aayi thi..ye baat aur koi nahi jaanta , sirf wo aur uska khuda jaanta hai ke jaanay kab se wo apnay rub se ye duaain karti thi ke wo Ahmed ko uski qismat main likh de.
Par uskay Baba jaan ke ek faislay ne Raawiya ke saaray khuaab chakna choor kar diye .
Uski Ammi us se uskay Inkaar ki wajash poochhti to wo aansoo bahaye sirf nafi main sar hila deti. Wo chah kar bhi kisi ko apni khuahish bata nahi pa rahi thi.
Wo dil hi dil main us Shehzaday ko bura bhala kehti ke agar wo na hota to Shayad Baba uski shadi apnay bhateejay aur Jahan-gheer chachu ke farzand(son) Ahmed se kara detay. Par nahi....! us Shehzaday ko uski zindagi main zehar bharnay ke liye aana hi tha.
" chachu Aap baba se baat karain na.." Chaltay huway Raawiya ne Jahan-gheer ke saamnay ruk kar Aas bharay lehjay main kaha.
Jahan-gheer ne haath ke isharay se wahan kharay sub pehray daaro'n ko wahan se jaanay ka keh kar apni laadli bhateeji ki taraf udaas muskurahat se dekha.
" bacha aap jaantay ho..Ye Aapkay baba ka faisla hai , aur wo is faislay se peechhay nahi hatain ge.."
" par..."
" agar do saal pehlay Shehzaday Ali apnay jungjoohon ke saath na aaye hotay to aaj hum sub yahan nahi hotay...ye jaanti hain na aap.!?."
" par uskay badlay main Baba humain kyun saza de rahay hain..!?..humain kyun unkay ahsaan ka badlaa chukaanay ke liye kaha jaa raha hai.., mehal main kitni larkiyaan hain jin main se kisi ko bhi us Shehzaaday ko diya jaa sakta tha , phir hum hi kyun...?!"
Raawiya ki Aankhon main paani bhar aaya tha, wo apnay Baba ke is faislay se bohat afsurda aur naaraaz thi.
Jahan-gheer ne usay wahien maidan main rakhay ek baray pathar par bithaya aur khud uskay saamnay ghutno'n ke bal beth gaye. Is umar main bhi wo apni Raawiya ke har laad uthanay ko tayaar thay.
" ye faisla bohat pehlay ho chuka tha Raawiya...sub jaantay hain ke aap ke ilaawa wo kisi aur se shaadi ke liye raazi nahien hongay. aap bachpan se hi Ali se mansoob hain..."Unhon ne Raawiya ko narmi se phir se ye sub bataaya jo wo pehlay bhi sun chuki thi. Is liye Raawiya hunooz chehra udaas kiye rahi to Jahaan-gheer ne uskay sar par haath rakhtay huway usay apni taraf dekhnay par majboor kiya.
" kya aap ko apnay Baba aur Hum pay bharosa nahi...?"
" hai..." Raawiya ne asbaat main sar hilatay huway halki Awaz main jawab diya.
" phir Aap ko kisi bhi baat ke liye paraishsn honay ki zaroorat nahi hai..theek hai..?"
Wo usay ek bachay ki tarhaan samjha rahay thay, usay mut'maeen karna chahtay thay, par unka apna dil Raawiya ki fikar main din raat karhta tha.
Poora khitta jaanta tha ke Shehzada Ali kin logo'n main shumaar kiya jaata hai. uska naam agar kisi ke saath jora jaata tha to wo thi uski talwaar aur maidan e jung. Wo shakhs jis ki zindagi maidaan ejung main khoon main nahaatay guzri hai , wo kis qadar sakht gheer ho sakta hai wo achhi tarhaan jaantay hain.
Wo kayi baar apnay bhaai se is ke mutallik baat bhi kar chukay thay ,par wo khud bhi jaantay thay ke Sultan apnay is faislay se peechhay nahi hat saktay. Do saal pehlay Ali ko unki madad ke liye bhaij kay unkay dost ne unkay liye inkaar ka koyi raasta hi nahien chhora tha.
Do saal pehlay Sultan Aalam-gheer ne kayi din'on tak soch bichaar ke baad apnay dost ko khat qasid ke zariye bhaija. jismain unho'n ne saaf saaf likha tha ke wo unki paish-kash qabool kartay huway Raawiya ko Ali ke naam kartay hain. Lekin unki bhi shart hai ke unka nikah do saal baad hoga.
Us din se Aaj tak Jahan-gheer ne Sultaan Aalam-gheer ki gair ilmi main Shehzaday Ali ke mutalliq mazeed jaan'nay ke liye apnay kayi khaas aadmi uski saltanat main bhaij diye thay.
Aur tab se abtak aisi koi khabar nahi aayi jismain Shehzaday Ali ko ayaash kaha gaya ho. Par ek Aisa paigaam zaroor Aaya tha jis main kaha gaya tha ke wo agar kuchh jaan'na chahtay hain to Shehzaday Ali unsay mulaqat ke liye tayaar hain. Is tarhaan unki saltanat main jaasoosi ke liye log bhaijna wo unki shaan ke laayak nahien samjhtay.
Usdin se Jahan-gheer ne apnay saaray jaasoos wapas bula liye thay. Par Wo dil se Shehzaday ki is qaabiliyat ke qaa'il bhi ho gaye thay.
" ab aap apni ammi jaan ke paas jaain , wo aap ka intzaar kar rahien hain. par pehlay libas tabdeel kar lejiye ga , agar unhon ne aap konis libaas main dekh liya to aap jaantien hain na wo kis qadar ghabraa jaayain gi. ..?"
Jahan-gheer ne uskay libaas ki taraf ishara krtay huway muskura kar kaha jo Raawiya talwaar baazi ke liye pehanti hai aur kisi sipaahi ke libaas mushaabay rakhti hai.
" jee.."
Raawiya honto'n pe nam muskurahat sajaye wahan se uth kar apni khuaab gaah ki tarf jaanay lagi, raastay main jitnay sipaahi thay wo apni shehzadi ke ahtraam main nazrain jhukaatay gaye. Kyunkay unhain Shehzadi ke chehray ki taraf dekhnay ki ijazat nahi thi.
Wo chaltay huway apni soch main guum thi. agar wo is shadi ko rok nahi sakti to theek hai..wo us Shehzzday ka jeena haraam to kar hi sakti hai. jisnay ek madad ke badlay uski saari khuahisho'n ko dhool main mila diya.
Par wo is baat se be-khabar thi ke jiska jeena mushkil karnay ka wo soch rahi thi, sub is fikar main laahaaq thay ke wo pathar kahien unki naazuk si kali ko massal na de.
*******vote and comment ********
Assalaam o Alaikum meray sipahiyon😊😊😊😊 maaf kijeye ga is late update ke liye.
Aaj ka chapter agar boring laga to sorry par ye sub likhna zaroori tha.
Ab se saltanat e Mohabbat Tuesday ko update hoga😊😊❤️❤️