Kasalukuyang nakahandusay at wala nang buhay ang mga Cleric na tutulong sana sa kanilang lahat...
May tatlong Cleric sa grupo na inatasan ni Jiang You na tumulong kay Unrivaled Super Hottie para nakawin ang BOSS. Walang kahit na sino sa kanilang lahat ang nag-akala na ganito ang mangyayari't sabay-sabay na mamamatay ang mga Cleric matapos ang atakeng pinakawalan ng Spitfire.
Natulala ang lahat, at halos hindi sila makapaniwala sa nangyari. Malinaw na ang mga Cleric lamang ang pinuntirya ng manlalarong 'yun dahil hindi naman nagtamo ng malalalim na pinsala ang ibang mga manlalarong hindi Cleric ang class.
Pero kahit na hindi naman talaga sila ang pinupuntirya ng atake ay naging sapat na ang eksena na kung saan talagang umuulan ng bala't granada ang kalangitan na bumalot sa kanila para sila ay mataranta't halos hindi na malaman kung ano ang kanilang gagawin.
