Ed aliingia nyumbani mida ya saa nne usiku baada ya kushiriki chakula cha jioni na Joselyn katika hoteli ya The Crest. Alimkuta Linus amekaa sebuleni akiangalia mpira
"Hey bro habari ya kazi?" Li alimsalimia Ed alipohisi yupo hatua chache kutoka alipo
"Poa, vipi umerudi mapema leo?" Alijibu Ed na kuelekea kwenye kochi lililokuwa pembeni.
"Sio sana, nilitaka kuona mechi hii" Li alijibu.
Ed alinyamaza kimya akajitupia kwenye kochi na kuegama huku akifumba macho yake. Alikuwa amechoka lakini si kwa sababu ya kazi pekee, bado alikuwa ana vita ndani ya moyo wake na akili zake. Kwa muda mfupi moyo wake umevutwa kwa Aretha, na wakati ana ahadi na Joselyn.
Hakujua kuelezea kinachoendelea kwenye moyo wake kila mara anapotokea kumuweka Aretha katika fikra zake.
Alipoketi hapa alitamani kumuuuliza Li kama anamfahamu Aretha na kwa nini alimfuatilia. Akajiuliza namna gani ya kuanza lakini akakosa kabisa. Akiwa amefumba macho alitafakari jioni ya leo alipokuwa na Joselyn, alihisi kumsaliti mtu. Swali kubwa lilikuwa nani anayemsaliti, Joselyn? Mwenyewe? Au Aretha?
"Bro, vipi umechoka sana?" Li alimtoa kwenye masumbufu aliyokuwa akiyatafakari
"No!" Alijibu akiwa vile vile amefumba macho.
Li aliposikia jibu lile, na kwa namna anavyomfahamu Ed alijua kuna jambo linamsumbua. Kwa kawaida jibu hili humtoka anapokuwa akitafuta suluhu ya jambo gumu katika fikra zake.
"Sawa bro, ila nipo hapa in case unatahitaji kuzungumza" alisema Li kwa hisia za upendo na kumfanya Ed ajihoji kama alionekana mwenye kusumbuka zaidi!
Kikapita kimya cha muda mfupi kati ya hawa ndugu wawili. Li alitamani kuanzisha mazungumzo kuhusu kitu kile kile ambacho kilikuwa kinamsumbua Ed lakini hakutaka kumuonesha kaka yake kuwa anamfatilia.
Kimya hiki kilivunjwa kwa sauti nzito iliyotoka na mikwaruzo kwaruzo ya uchovu..
"Li" aliita Ed akiwa amefumba macho, kichwa kaegama kwenye kochi
"Yes bro" Li aliitika huku akiwa na shauku ya kusikia kama Ed atakuwa muwazi juu ya hisia zake.
"Ulimfatilia Aretha alipotoka ofisini kwangu?" Ed aliuliza kwa sauti ya chini
Looh! Swali lilikuja kama suprise kwa Li, na moja kwa moja akajua alionekana hakuwa na namna yoyote ya kuficha. Sasa alijua kazi imeanza ya kumuamsha kaka yake kwenye ukweli wa hisia zake.
"Ndio, nilimfatilia" alimjibu kwa ufupi
Ed alivuta pumzi ndefu kisha akafumbua macho na kumuangalia Li ambaye alijifanya yuko makini kwenye runinga lakini alijua nini anafanya.
"Unamfahamu?" Ed aliendelea huku akimkazia macho Li
"Hapana bro nilimuona pale ofisini?" Jibu hili la Li likatibua joto katika mwili wa Ed. Akanyamaza kidogo kutafuta katika kona gani aendelee. Li hamfahamu Aretha lakini kaamua kumfuatilia, je ametokea kumpenda? Mapigo ya moyo ya Ed yaliongezeka wazo hili lilipogonga fikra zake.
"Kwani kuna shida bro?" Aliuliza Li baada ya kuona kimya upande wa kaka yake.
Hii haikuwa rahisi kujibu, Ed akashusha pumzi
"No!" Jibu pekee lililomfanya Li ashindwe kujizuia kutabasamu, tabasamu ambalo halikufichika kwa Ed kugundua na kuuliza
"Mbona umetabasamu?"
Li akaona atumie mwanya huo kumchanganya zaidi kaka yake..
"Nimefurahi tu kuwa hapana shida kwako mimi kumfuatilia mgeni wako."
Uwhhhh Li, kwa jibu hili alipiga mshale kwenye eneo la hatari. Ed alijitahidi kutunza muonekano wa utulivu nje lakini ndani kulikuwa na mapambano yakiendelea. Hakuweza kuzuia ghasia katika hisia zake na akalipua swali kwa Li, ambalo mitetemo ya sauti yake ilimfanya Li ashangilie ndani
"Kumfuatiliaje Li?"
Mikono ya Ed aliikunja kuzuia kuonekana kwa hisia zake za wivu zilizoanza kutanda katika moyo wake.
"Hahaha bro vipi kwani, ni kufuatilia kitu kizuri ukikiona" Li alijibu kwa kicheko chepesi cha utani huku akijua athari ya maneno yale kwa kaka yake.
Ed alimuangalia Li kwa jicho lilionesha kuhitaji maelezo zaidi, wakati huo aliomba moyoni mwake isije ikawa Li amevutiwa na Aretha maana hakika hatoweza kuvumilia kumkatili mdogo wake.
"Usijali bro nilitamani kumfahamu tu kidogo lakini sikumuona. Let's hope for next time." Li aliongeza tena chumvi kwenye kidonda.
"Mmmm" Ed aliguna.
*******************