Saal 2009, mujhe ek sunar pe dekhi payal bohot pasand ayi. Uska daam poochha toh dukan dar ne 500 rupay bataya. Aur 500 us time samay bohot zada hote they lekin mujhe naya naya shonk tha gullak me paise ikattha karne ka. Mera birthday aur rakhi dono kuchh mahino mein ane wali thi. Toh maine paise jodna shuru kar diya. Agle do teen mahine lage mujhe lekin maine meri gullak mein 500 rupe jod liye. Main us gullak ko sara time apne pas rakhti thi, jaise koi bohot badi amount us me hai, darti thi ki kahi chori na ho jaye jaise koi bhi 7-8 sal ka bachcha krega. Aur jab mai apni maa ke saath wapis us dukan mein gayi tab pata chala ki kyuki woh payal chandi ki thi aur ab uska price badh ke 525 rupay tha. Lekin mere pas they pure 500 rupay they. Lekin meri maa ne us baat se koi farq nhi padne diya, mujhe payal khareed di.
Lekin woh incident mujhe aaj tak isliye yaad hai aur usne itna prabhav dala hai mujhpe ki us din mujhe ek aise chor ke bare mein pata chala jo kisi bhi tijori mein ghus sakta hai. Inflation' ye naam toh mujhe bohot baad mein sunne ko mila lekin isse mera introduction bohot pehle ho chuka tha as I just told you.
Is waqt to toh mere parents ne un 25 rupay ka farq mehsoos nhi hone diya lekin future mein aisa mere liye koi bhi nhi karne wala. Ab samajh ata hai is mehangai shabd ka asli matlab jab bachpan mein 5 paise ka sikka a pachaas ka sikka dekh ke achambha sa hota tha ki na jane ye kis desh ke sikke hai, dada pardada ne kaise 1000 rupe mein zameen khareed kar humara ghar banaya ye sun ke ajeeb sa lagta tha, aaj dollar aur rupaye ke badhte fark ko dekh kar samajh ata hai ki humare mehnat ke paise tijori me bhi surakshit nahi.
Ab lagta hai ki bas kagaz aur tamba hai ye mudra jo kabhi khareed sakta tha sona chandi us se roti milni bhi hui hai muskhil.
ek badhte bachche ki bhookh ki tarha hai inflation, jiska badhna desh mein vikaas ka sandesh hai. lekin ab ye bhookh zada badhne lagi hai, ki poore desh ko nigalne lagi hai.
Kahawat hai ki pair utne hi pasarne chahiye chadar jitni lambi ho, lekin ye mat bhoolna ki zarooratein badh jati hai samay ke saath lekin ye chadar utne ki utne rehti hai.
Are sone ki chiriya kehte they is desh ko, sona toh chala gaya, aur de gaya ek naya matlab is kahani ko 'sau sonar ki aur ek lohar ki' lekin ye chiriya ab mehangai ke par lagaye asmaan chhoo rahi hai
Netaon ko ek doosre par lalchan lagate dekha hai, ate dal petrol ke damon par behes dekhi hai , arthshastra mein maang aur purti ka anokha rishta bhi samajha hai, jo ab tak dekhne ko nahi mila woh hai janta ko mila sukoon.
akhir kya cheez hai ye sabzi khareedne se katrate haath, bhav poochh kar peechhe hat jane wale pair, dawai ke bina bukhar se tapta maatha aur aansoo aur nirasha se bhare aankhein. itna sab karta hai ye rang biranga kagaz ka tukda jo uth jaye toh insan ko raja banade je gir jaye toh fakir