Alas diés na ning béngi, mitutundú né ing métung a báyuntáwu. Kákaibat nang méndílû, aniá mántun yang málan a ásúlud na panudtud. Mípalábas ya kétang salamin king kuártú nang lúpang kúlang king métung ampó kapitnang métru ing kábâ, at kapitnang métru ing lápad. Paulí na ning masanting santing yang laláki [é ka makápiu], siémpré, nánu pa mó, línáwé ya kétang salamin bán néng pagyamyaman ing lúpa nang kapmú king santing.

Bistáman késantingan ya king lúpa na [pasibáyu, é ká pin makápiú, né?], mípaláwé ya king katáwán nang lubas, úling alá ya ping málan ing altî.

"Aaaaaiiiiii, katabá ku na palá né?" ngána aniang kaláwé na king atián na.

"Mípakanán' kata rugû, ná tsóng?" ngána kábang apis apisán né ing kayang ménabâ.

Détangán na né sána ning lumbé, ónéng tínalangá yang pasibáyu at lináwé né ing lúpa na.

"Masanting ku pa rin naman, alê? Hehe!" ngána king saríli na. Kaibat líbán na nó détang kayang aparadul bán néng kumang málang paniblas. Kaibat na níta, mématdá néng sulû, at saká né migkérá king kayang pagkéran [núkarin pa mó né?].

Kakérá na, mísublí ya ing kayang ísip kétang kayang íkit king salamin, aniá king óras a ita, péngakuán né ing saríli na.

"Búkas, alas síngku y médiá na pá' ning ábak, mag-jogging ná ku! Tútutú ku!!!!" gílísak na báyu nó séra déng kayang mata báng matudtud. Mígísing ya ing wáli na king sumángid, úlí na níta.

"Oy kóy!! 'Siglá mó ná?! Mát'tud ná ku yé!!!!!"

Ónéng é na né dinínan pang pansin ning báyuntáwu ita. Béláwus na né ing kayang maniámang kérâ, úling marápal néng mag-jogging pótang kagísing nang ábak at mániampukákí na king kayang lub ing kaburián nang magbáyu at sumanting pang lálus. Maging "báyung báyuntáwu".

Ónéng ating probléma, ákalinguan kiá mung sabian. Malaram ya ing báyuntáwu. Pané pané yang máglaram, yang détangang kasantingan [pasibáyu, é ka sigurádu]. Métung na néng búlang páglaraman ing saríli na. Páglaraman ing saríli nang mag-jogging né bálang ábak.

At king katutuán na pin ning tútuking miliári, mígísing yang alas nuébi. Kinuá né ing selpón nang makalélé king pagkéran. Migbabad yang kapitnang óras karing memes báyu ya tínikdó't minta king sálas.

"Aybá! Dánun mung mígísing ngéné né Sirô?!" ngánang Imá na kaya, úlí na ning kayang asdan.

"Ha! Mágbáyung bié ná ku siémpuré!" pakíbat na.

At saká na na péglaklak ngan itang Jollibee a sélí nang Imá na, a karéla sánang almusalan. Akalinguán néng panágan ing wáli nang babáying mándílû, úling ibat yang mig-bike king Clark.