"Kóyáng, kóyáng, mamirápal [mamalaguâ] ka! Manyáman ta!"
Pánabítán né ning wáli ing Kóya nang mánagaktak pa mú rin king páwas. Lúpa yang mébungsul ing kóya, úling ikwá nang mégisan danum king katáwan, sangkán na ning lisángan. Inágut néng masikan ning Kóya ing gámat na king talán nang wáli na. Línápit ya king blówer at saká né ita sinindî. Tinódu né ing blówer, #3. Tinútuk né kétang luklúkan king lamésa nung nókarín na buring lukluk.
"Ó't rugú káéksáitéd [ká-excited] mó ná? Malyári na ka wáring minum kapé, ná náng? Kayanak-anakan mu pá yé!" ngána ning kóya kábang lálápit ya king luklúkán na.
"GÁH! I kóyang kó! Balám' galáng gahágahá! Dalagíta ná ku yáy! Turéssi [trési] ná ku kanyan at burí nang sabian níta, zeeneyyjzer [teenager] ná ku abáy!"
King sangkang é mu pa bálû, é pa lúlukluk i Gánggáng kéng luklúkan a síping nang kóya na. Makatalakad yá mû kéng gúlut na ning luklúkan a balámu mó métung yang reina karéng palabas a ápanalbén mu kéng Britannia. Gináwuk né ing pamépé king bulsá na, kaibat binusní né ining masalúsú [mabilis] gámit ing kayang wanang gámat. Tinúlak niá rin pagúlut ing buak na, kaibat mégumpisá néng mamépé.
"Nuk'kó né... Ampó ó't makanyan ka rugung sásábi ngéni ná? É ku bálú nung prinsésa ka mó kanyán ó métung kang mípasóbra king anime, ó mélúsé na ka.. Dayig mó pa réng mándarámé nung makágégé kang bábátak."
Méngapaísip yá rin i Chíku nung ó bákit pipépén néng Gánggáng ing saríli na ngéning sinindí na né ing blówer. At #3 ya pa.
"Tsk tsk tsk tsk tsk tsk tsk tsk!! É ka wárí masuélu yáy? Igkat- hmm, ó sabian ku na móng, 'kinumbiran', na ka ning métung a malagung babáying kalúpa kÓ?! GaháHÁ!!"
"Lókó kanyan kanyan ka kén a balám' bágé mu.."
Ing lúpa nang Chíku mégin yang anti king métung a kóyang mélináwan king katutuang lúsé ya pala ing kapatad nang luluguran.
"HÁ! É ké bágé ing kákung pámanialítâ! Ing pámanialítâ ku, bágé ná ku!!"
"Nááááá????? É lá paréwu rétá?? (_-_)..."
Bagyá bagyá néng mawawalang tiwálá i Chíku king yátû. Mángapaísip yang páglingkurán [deceiving] da né ning saríli nang mata't balugbug.
"Ay patúgut na kang kúkutang nang kúkutang kóyáng! Úling-!! Háháhá!!"
Tikpán néng Gánggáng ing kayang asbuk gámit ing kayang makabusning pamépé.
"Úliiiinnnggg??"
Sérá néng Gánggáng ing pamépé na, kaibat tinuldú né ini patas.
"Paúlí na ning mágpakayáma ku kéng báwu da réng kópi binZ!!! Aróma, kóyáng! Arómâ!!"
(Gâhh,,,, kapilan ya pa mégumpisang mélúsé ing wáli kung aini...)
Kábang luluat lang misasábi, bagyá bagyá nang pánamdamang Chíku a masisírá né pángatáwu. Anyá génakán na ná mú nung nókarin na itang kapé ra.
"Hmmm.. oy Gáng. Balá ku sáng méglútú yang kapé i Mámâ?"
"Awá pin. Gínawá yang kapé."
"Nung makan'ta, antayu?"
"Gísan ku na."
"Ná?"
"Gísan ku ná pin ákó."
"Nung makan'ta ót ináwus mu ku pa???"
"Báng ábáwu mu ing kapéng pédalá nang Mámi Dára Diane."
"Oy murét! Kapilan mé impisang áwsang Mámi Dára ing Dárang Yányán?!?!?!"
"Mi kóyá a Léricó, alá kang elegáncia y delicadézá!!!"
Pákabilak la réng talírí na king kailing gámat king libútad nang sálú kábang sasabián na ita.
"Óy kapilan mu ku wárí ináwus king lagyú ku ná?! Patúgut na ka mó! Kínaligkig ku kéta ná! Ampó ó't mág-Español ka....??"
"HÁhÁHÁÁÁ!!!"
Patiman tíman ya i Gánggáng at bisní né ing pamépé na king arap nang asbuk. Kaibat mégumpisá né nanamang mamépéng alang patúgut, andyáng pang asna néng kasikan ing blówer.
"Náááááng pikailí kailí mu kéééén?!?!?! Ó't káyi nandin ána kang ká-excited káyi ámu pa 'manyáman ta!'?!!"
"Awá pin. Manyáman kasi átakman ku na!!! Gehehegehehegehehe!!!"
At sérá néng Gánggáng pasibáyu ing pamépé na. É ku rin rugú bálú nánu ing sangkan ó't mó gagáwán na ita.
"Dugpán na ka sá ning altê, buisit kang anak ká! Máyápang é na ká' méragul, más kyut ka pa anyang mánúlú ka pa sipun a binábî."
Áulatá nang Léri- Chíku pala, a é pa rin lúlukluk i Gánggáng angga ngéni. Pákatalakad yá mú king gúlut na ning luklúkán na. Anyá kitnángan né ning Kóya.
"Óy Gáng. Lukluk ká ó lukluk ka?"
"Kabágal mu naman kóyáng! É ka pala matalúkî! I expected too mátssss [much]!!"
"??????????????????? -.-"
"Jzénthélmánn [gentleman] ka kanyán? É mu ya man áisípang paglélé luklúkan i wál- ing prinsésang kalúpa kó?!"
"Oy nánu yang klásing pantásiang pikudtang pikatsan yan?"
Lalawén néng Chíku i Gánggáng a balámu é ya makápaniwálang kélusén né i wáli na.
Mélukámí yang mékuláming mésumáming mésórá ing kóya, sangkán na ning pálî't lisángan, kayagnán na ning wáli nang kélusén. Anyá pildak né ing luklúkang dápat nang luklukang Gánggáng. Sínulagpó ya ing luklúkang adduang métru.
*KALABUG!!!*
Mísápung ya itang luklúkang aita kétang métung pang luklúkan king sálas. Lúpang mégasgas ya itang barnis da.
"GhkkkCC!!"
Mípalundag yang bagyá pagúlut i Gánggáng. É na bálú nung nánu ya ing ginísing na kang kóya na. Sangkán na ning kayang asdan, tikpán né ing kayang lúpa gámit ing kayang pamépéng makabusnî at méngapapiak niá mú kabud kabud.
"Wóy. Sublí mu né mó itang luklúkan aita kéné. Bá kung ating pipatúngan bitis."
"Ópû..."
At kabud niá mú méwalá ing mapagmaragul nang pámanialítang Gánggáng. É ya bínúlad, anyá é né rin gínégé pâ. Kabud kabud, métunud ya.