Kahit gaano pa kabilis ang naging aksyon ni Xu Jiamu, nabutas pa rin ng
apoy ang papel.
Nang balikan niya ng tingin ang katapat niyang villa, nakita niya na
magkasunod na naglalakad papasok ang dalawa. Pagkatapos ienter ni Lu
Jinnian ang pin code sa pintuan, nakita niyang may sinabi si Qiao Anhao.
Medyo malayo siya para marinig ang pinaguusapan ng mga ito pero nakita
niyang ngumiti ang kaibigan niya at hinimas ng kapatid niya ang buhok
nito habang binubuksan ang pintuan.
Hindi kaagad nagsara ang pintuan kaya nakita niya pa ang dalawa na
nakatayo sa entrance. Lumuhod si Lu Jinnian para tulungan si Qiao Anhao
na magtanggal ng sapatos bago ito kumuha ng isang pares ng
pambabaeng tsinelas. Pagkatapos magpalit ni Qiao Anhao, tumingkayad
ito para halikan ang pisngi ni Lu Jinnian. Halatang nagulat ang kapatid
niya pero hindi nagtagal, bigla nitong hinila si Qiao Anhao na para bang
susunggab ito ng halik. Noong malapit na ang mukha ng dalawa, bigla
namang hinarang ni Qiao Anhao ang boquet sa mukha nito at parang isang
bata na tumakbo papasok sa loob ng bahay.
Ngayon niya lang nakita na ganun kasaya si Lu Jinnian. Mula pagkabata
kasi ay madalas na talaga itong mukhang seryoso pero ngayon, nakangiti
lang ito habang sinusundan ng tingin si Qiao Anhao na tumakbo papasok.
Pagkalipas ng ilang segundo, nagpalit ito ng sapatos at isinarado ang
pintuan.
Habang nasa loob ng sasakyan, napabuntong hininga nalang si Xu Jiamu.
Pagkayuko niya, napansin niya kaagad ang pirma sa hawak niyang will
and testament.
Kahit na medyo malabo ang photocopy, kabisado niya pa rin ang pirma ni
Lu Jinnian.
Ano bang dapat niyang maramdaman? Maging siya ay hindi niya rin
maintindihan kung anong nangyayari sakanya pero biglang nanginig ang
kanyang mga kamay na nakahawak sa kumpol ng mga papael. Totoo ang
lahat ng nangyari kahapon, pero bakit pakiramdam niya ay nasa loob siya
ng isang panagip? Bakit ba nagkaganito ang lahat?
Sa tuwing magkikita sila ni Lu Jinnian, lagi siyang excited na batiin ito at
sobrang saya niya sa tuwing tinatawag niya itong 'bro'.
Ganun din kapag nagkikita sila ni Qiao Qiao, lagi lang itong nakangiti
sakanya at tinatawag siyang Brother Jiamu.
Pero ngayon… bakit natatakot siyang harapin ang dalawa?
Ilang sandali pa ang lumipas na nakatitig lang siya sa mga hawak niyang
papel bago niya muling iistart ang sasakyan niya at dahan-dahang
magmaniobra palabas ng Mian Xiu Garden.
Sakto, labasan na rin ng mga galing sa trabaho kaya kahit saang sulok ng
Beijing ay napakarami talagang sasakyan. Aapak lang siya ng isang
segundo sa accelerator at bababad nanaman ang paa niya sa preno. Hindi
siya nagmamadali kaya tyinagaan niyang suyudin ang mabigat na traffic
kahit wala siya sa sarili. Hindi nagtagal, bigla siyang nablangko kaya hindi
niya namalayan na nabangga niya na ang likuran ng sasakyang nasa
harapan niya.
Pero mabuti nalang dahil hindi naman seryoso ang naging pinsala at ang
nabangga niyang sasakyan ay taxi. Nagmamadali na ang kabilang driver
dahil may kailangan pa itong sunduin kaya hindi na sila tumawag ng pulis
at nanghingi nalang ito ng isang libong yuan. Hindi na siya nakipagtawaran
pa at binayaran nalang ito kaagad. Pagkatapos ng aregluhan, nagpatuloy
siya sa pagmamaneho kahit sira ang isa niyang headlight.
Malalim na ang gabi noong nahimasmasan siya at doon niya lang napansin
na nasa tapat na siya ng Suyuan apartment.
Hindi pa siya makapaniwala noong una kung paano siya nakarating doon
kaya ilang segundo pa ang lumipas bago niya apakan ang preno.
Pagkahinto niya ng sasakyan, tumingin siya sa entrance ng apartment, na
para bang may malalim na iniisip.
Dito nakatira si Song Xiangsi… Lima hanggang anim na buwan na noong
huling beses silang nagusap… Siguradong maganda na ang nangyayari sa
buhay nito ngayon. Noong nagpunta siya sa isang dinner, usap-usapan na
kinuha raw itong judge sa isang variety show ng isang TV station at ang
balita ay aabot ng bilyon ang offer dito!
Hindi niya alam kung bakit dito siya dinala ng sarili niya pero gusto niya
muna sanang samantalahin ang pagkakataon na ipahinga ang utak niya sa
lahat ng mga problemang gumugulo sakanya sa mismong lugar na ito kaya
lumabas siya ng kanyang sasakyan at sumandal dito habang nakatitig sa
apartment ni Song Xiangsi. Hindi nagtagal, nahimasmasan siya nang may
marinig siyang nagbukas na pintuan ng minivan, na pumarada sa tabi ng
sasakyan niya. Noong oras palang na 'yun, kinutuban na siya kaya dali-
dali siyang lumingon at tama nga ang sinasabi ng puso niya dahil si Song
Xiangsi nga ang dumating. Hindi siya napansin nito dahil abala ito sa
pagpapagalit sa manager nito bago ito maglakad papunta sa entrance ng
apartment.